Кәсіпорын өзге ұйымнан персонал тартқанда, тартылған жұмыскерлердің өмірі мен денсаулығы үшін жауапкершілік тек оларды жіберген компанияда ғана қалмайды. Қазақстанның Еңбек кодексі бойынша персонал беру шарты аясында жұмыс күшін қабылдаған тарап еңбек қауіпсіздігі мен еңбекті қорғауға тікелей жауапты болады.
Шарт жасасу кезіндегі басты талап: аттестаттау нәтижесі
Персонал тартуды жоспарлаған қабылдаушы тарап шарт жасасу кезеңінде жіберуші тарапқа өндірістік объектілерді еңбек жағдайлары бойынша аттестаттау нәтижелерін ұсынуға міндетті. Егер мұндай құжат ұсынылмаса, заң жіберуші тарапқа персонал беруге арналған шартты жасасуға тікелей тыйым салады. Бұл норма жұмыскерлердің белгісіз әрі тексерілмеген қауіпті ортаға жіберілуіне тосқауыл қояды.
Қабылдаушы тараптың негізгі міндеттері
Өндірістік ортаға келген жұмыскерлер үшін қабылдаушы тарап мынадай нақты міндеттерді орындауы қажет:
- жұмыс орындарында профилактика жүргізіп, жабдықтар мен технологиялық процестерді барынша қауіпсіз түрлеріне ауыстыру арқылы кез келген тәуекелдердің алдын алу;
- жіберілген жұмыскерлерге еңбек қауіпсіздігі және еңбекті қорғау мәселелері бойынша міндетті нұсқама жүргізу;
- санитариялық-эпидемиологиялық саламаттылық саласындағы уәкілетті мемлекеттік орган белгілеген нормативтерге сәйкес санитариялық-гигиеналық жағдай жасау;
- он сегіз жасқа толмаған жұмыскерлер мен әйелдердің өздері үшін белгіленген шекті нормалардан асатын ауыр заттарды қолмен көтеруіне немесе қозғалтуына жол бермеу;
- авариялық жағдайдың өршуін және қызметкерлердің жарақаттануын болғызбау үшін шұғыл шаралар қабылдау.
Сонымен қатар қабылдаушы тарап еңбек қызметіне байланысты кәсіптік аурулар мен жазатайым оқиғаларды талдап отырады. Егер өндірісте оқыс жағдай орын алса, оны жіберуші тараппен бірлесіп, заңнамада белгіленген тәртіппен тергеп-тексеруге міндетті. Еңбек кодексінде көзделген жағдайларда, шарт талаптарына сай жіберуші тарапты дереу хабардар ете отырып, жұмыскерді жұмыстан шеттету де қабылдаушы тараптың міндетіне жатады.
Қабылдаушы тарап қандай құқықтарға ие?
Заң талаптары қабылдаушы субъектіге тек жауапкершілік артып қоймай, өндіріс тәртібін бақылауға мүмкіндік беретін бірқатар құқықтар береді. Атап айтқанда, ол жіберілген жұмыскерлерден қауіпсіздік ережелерінің мүлтіксіз сақталуын талап етуге құқылы.
Сондай-ақ қабылдаушы тарап жұмыс орындарында қолайлы жағдай жасауға жәрдемдескен немесе қауіпсіздікке қатысты ұтымды ұсыныс енгізген жұмыскерлерді ынталандырып, көтермелей алады. Персонал беру шартында көзделген жағдайда, тартылған мамандарды өз қаражаты есебінен профилактикалық медициналық қарап-тексеруге жіберуге де құқылы.
Дереккөз: Қазақстан Республикасының «Әділет» ақпараттық-құқықтық жүйесі